आर्थिक वर्ष २०८२/८३ मा २,७७८ बालबालिकालाई स्वर्णबिन्दु प्राशन सेवा
दमौली, तनहुँ - प्रदेश आयुर्वेद चिकित्सालय, तनहुँले आर्थिक वर्ष २०८२/८३ मा कुल २,७७८ जना बालबालिकालाई स्वर्णबिन्दु प्राशन सेवा प्रदान गरेको जनाएको छ। बालबालिकाको शारीरिक तथा मानसिक विकासलाई सहयोग पुर्याउने उद्देश्यले चिकित्सालयले नेपाल सरकारको नियमित आयुर्वेद स्वास्थ्य सेवा कार्यक्रम अन्तर्गत यो सेवा सञ्चालन गर्दै आएको छ।
चिकित्सालयका अनुसार स्वर्णबिन्दु प्राशन सुवर्ण भस्म, मह, घिउ तथा विभिन्न आयुर्वेदिक जडीबुटीको मिश्रणबाट तयार पारिन्छ। आयुर्वेदीय परम्परा अनुसार यो सेवा विशेषगरी पुष्य नक्षत्रका दिन १ बर्ष देखि ५ वर्षमुनिका बालबालिकालाई प्रदान गरिन्छ।
चिकित्सालयका आयुर्वेद चिकित्सक डा. नारायण श्रेष्ठका अनुसार आयुर्वेद शास्त्रमा नियमित स्वर्णबिन्दु प्राशनले बालबालिकाको रोगप्रतिरोधात्मक क्षमता, स्मरणशक्ति तथा पाचनशक्तिलाई सहयोग पुग्ने विश्वास गरिएको छ।
चिकित्सालयका अनुसार पछिल्ला वर्षहरूमा आयुर्वेदिक स्वास्थ्य सेवाप्रति सर्वसाधारणको आकर्षण र विश्वास बढ्दै जाँदा स्वर्णबिन्दु प्राशन सेवा लिने बालबालिकाको संख्यामा पनि वृद्धि भएको छ। आगामी दिनमा समेत यस सेवालाई थप व्यवस्थित र प्रभावकारी रूपमा निरन्तर सञ्चालन गर्ने चिकित्सालयको योजना रहेको जनाएको छ।
Download: आर्थिक वर्ष २०८२/८३ मा २,७७८ बालबालिकालाई स्वर्णबिन्दु प्राशन सेवा
13